Сваякі Юрыя Захаранкі спадзяюцца, што новая ўлада правядзе грунтоўнае расследаванне па знікненнях

Лідэр дэмакратычнага руху выказаў падтрымку сваякам усіх бясследна зніклых у Беларусі людзей і выказаў меркаванне, што правядзенне грунтоўнага расследавання па кожным знікненні павінна стаць маральным абавязкам дэмакратычнай улады перад грамадствам.

Любоў Міхайлаўна пажадала адзінаму прэтэндэнту перамогі ў палітычнай кампаніі 2006 года. "Можа быць, Вам атрымаецца расследаваць акалічнасці знікнення Юрася", - заявіла сваячка генерала Захаранкі.

З наведвання горада Васілевічы пачаўся чацвёрты дзень паездкі Аляксандра Мілінкевіча па Гомельскай вобласці. Лідэр дэмакратычнага руху пабываў у мясцовай бібліятэцы і перадаў у дарунак ёй каля 100 кніг беларускіх і замежных аўтараў, наведаў школьны краязнаўчы музей, гутарыў з жыхарамі каля крамы і на рынку.

Далей маршрут адзінага прэтэндэнта на пасаду прэзідэнта пралягаў у Светлагорск. Тут Аляксандр Мілінкевіч наведаў рынак, паліклініку, гутарыў з рабочымі каля прахадных шэрагу прадпрыемстваў.