Па справе Зарэмбюка дапыталі Васіля Клімовіча

У межах крымінальнай справы, узбуджанай упраўленнем КДБ па Гродзенскай вобласці супраць каардынатара руха “За Свабоду” Алеся Зарэмбюка, супрацоўнікі КДБ дапыталі кандыдата ў дэпутаты Мастоўскага савета, грамадскага актывіста Васіля Клімовіча.

Допыт Васіля Клімовіча адбыўся ў  будынку Мастоўскай раённай пракуратуры. Супрацоўнік КДБ па прозвішчу Павядайка выклікаў дэмакратычнага актывіста ў якасці сведкі. Пытанні тычыліся фінансавага складніка крымінальнай справы супраць Алеся Зарэмбюка, якога абвінавачваюць у махлярстве:

- Спытаў, ці я ведаю Зарэмбюка, потым паказаў мне дзве пластыкавыя карткі з нейкіх банкаў. Пытаўся ў мяне пра гэтыя карткі. Сказаў, што гэтыя карткі былі канфіскаваныя ў яго пры вобшуку. Пытаўся, ці бачыў я іх раней, што я пра іх ведаю? Ці здымаў ён пры мне грошы? Хто яму на гэтыя карткі кладзе яму грошы? Ці правозіў ён грошы праз мяжу? І яшчэ хто пра гэтыя карткі ведае?

Дэмакратычныя актывісты Мастоўскага раёна не выключаюць, што захады супрацоўнікаў Камітэта дзяржаўнай бяспекі накіраваныя на тое, каб перашкодзіць паўнавартасна правесці выбарчую кампанію апазіцыйным кандыдатам рэгіёна.