Хроніка затрыманняў Мілінкевіча

Хроніка затрыманняў лідэра аб’яднаных дэмсіл Аляксандра Мілінкевіча за перыяд палітычнай кампаніі “мясцовыя выбары” (лістапад 2006-студзень 2007).

У Добрушы знік кандыдат, за якога едзе агітаваць МІЛІНКЕВІЧ

Уладзімір Кацора, кіраўнік Гомельскаго абласнога штаба Аляксандра Мілінкевіча, паведаміў, што ад раніцы не можа знайсці мясцовага кандытата ў дэпутаты Марка Саннікава. Кацора не выключае, што Саннікаў быў затрыманы і знаходзіцца ў міліцыі.

Бенефіс гомельскай міліцыі - МІЛІНКЕВІЧ затрыманы трэці раз

Інцыдэнт адбыўся ўжо за 20 кіламетраў ад Гомелю. Цяпер Аляксандра Мілінкевіча абвінавачваюць у тым, што едучы ў машыне не быў прышпілены пасам бяспекі. Ідзе разбіральніцтва.

У Гомеле на МІЛІНКЕВІЧА чакалі 400 чалавек. Толькі пасля заканчэння сустрэчы міліцыя выпусціла МІЛІНКЕВІЧА на волю

Роўна а 16-й гадзіне рэчыцкая міліцыя, папрасіўшы прабачэнне, адпусціла Аляксандра Мілінкевіча на волю. Роўна а 16-й гадзіне ў Гомеле скончылася сустрэча дэмакратычных кандыдатаў з выбарцамі, на якой меўся выступіць лідэр аб'яднаных дэмакратычных сіл. У сустрэчы ўзялі ўдзел больш за 400 чалавек.

Аляксандр Мілінкевіч накіроўваецца на Добруш. Чакаем новых подзвігаў ад доблеснай гомельскай міліцыі.

МІЛІНКЕВІЧ ізноў затрыманы міліцыяй

Міліцыя ізноў затрымала лідэра аб'яднаных дэмакратычных сіл Аляксандра Мілінкевіча. Гэтым разам на выездзе з Рэчыцы.Цяпер яго абвінавачваюць нібыта ў здзяйсненні дарожна-транспартнага здарэння, хаця Мілінкевіч не едзе нават за рулём.Міліцыянты спрабуюць даставіць палітыка ў райаддзел, аднак ён адмаўляецца, бо лічыць чарговае затрыманне незаконным. Па звестках людзей, якія суправаджаюць Аляксандра Мілінкевіча ў паездцы па Гомельшчыне, супрацоўнікі рэчыцкай міліцыі выклікалі АМАП. Мілінкевіч піша скаргу на імя раённага пракурора.

МІЛІНКЕВІЧ на волі

Скончылася чарговае шоў беларускай міліцыі. У 12.53 Аляксандр Мілінкевіч і Аляксей Кавалец выйшлі на волю. Натуральна, што слядоў алкаголю ў крыві палітыкаў знойдзена не было.

Дзеянні міліцыі - акцыя, скіраваная на зрыў сустрэч з выбарцамі

Аляксандр Мілінкевіч лічыць дзеянні светлагорскай міліцыі "спланаванай акцыяй, з мэтай сарваць публічныя сустрэчы з выбарцамі Гомельшчыны". Затрыманыя знаходзяцца цяпер у адным з шпіталяў Светлагорску, дзе здаюць аналізы на наяўнасць алкаголю ў крыві.

МІЛІНКЕВІЧ затрыманы ў Светлагорску!

Лідэр аб'яднаных дэмакратычных сіл Беларусі Аляксандр Мілінкевіч затрыманы супрацоўнікамі міліцыі на пад'ездзе да Светлагорску. Міліцыянты абвінавачваюць палітыка ў тым, што ён нібыта знаходзіцца ў нецвярозым стане. Разам з Аляксандрам Мілінкевічам затрыманы таксама Аляксей Кавалец, кіраўнік мінскай гарадской арганізацыі Партыі БНФ.

Аляксандр Мілінкевіч распачаў завяршальны этап палітычнай кампаніі “мясцовыя выбары”

Да 14 студзеня, дня выбараў, Аляксандр Мілінкевіч будзе весці агітацыйную кампанію за дэмакратычных кандыдатаў ва ўсіх абласцях краіны. Сустрэчы з выбарцамі рыхтуюцца ў Мазыры, Калінкавічах, Гродна, Мастах, Барані, Полацку і Наваполацку, Брэсце, шэрагу населеных пунктаў Магілеўскай, Мінскай і Брэсцкай абласцях. Плануецца, што колькасць населеных пунктаў, дзе лідэр аб’яднаных дэмакратычных сіл узяў непасрэдны ўдзел у кампаніях дэмакратычных кандыдатаў сягне 43 гарадоў і мястэчак.

Палітрада АДС рыхтуе тэкст Заявы ў справе беларуска-расійскага канфлікту

Палітычная рада аб'яднаных дэмакратычных сіл пад кіраўніцтвам Аляксандра Мілінкевіча вызначыла сваю пазіцыю адносна беларуска-расейскага газанафтавага канфлікту.