За нашу і вашу Свабоду!
Дарагія сябры!
Ад усяго сэрца хачу павіншаваць Вашу арганізацыю з узнагародай прэміяй імя Андрэя Сахарава "За свабоду думкі", а таксама асабіста выбітных праваабаронцаў Людмілу Аляксееву, Алега Арлова і Сяргея Кавалёва.
Мы, прадстаўнікі грамадзянскай супольнасці высока цэнім тую вялікую працу, якую Вы нястомна праводзіце многія гады спачатку ў СССР, а сёння ў Расійскай Федэрацыі, адстойваючы справядлівасць, законнасць і чалавечую годнасць. Беларусы шчыра зацікаўленыя ў тым, каб Расія была дэмакратычнай, свабоднай і прававой дзяржавай.
Сёння Вы, як ніхто іншы, заслугоўваеце высокай еўрапейскай узнагароды. Для нас сімвалічна і тое, што ў гэтым годзе ўручэнне прэміі супала з 20-годдзем з дня смерці Андрэя Сахарава, які быў першым старшынёй "Мемарыяла".
Ваш унёсак і заслугі ў змаганні за права на свабоду думкі ў Вас на радзіме і ў краінах былога Савецкага Саюзу неаспрэчныя. Узаемаразуменне, узаемадапамога і чалавечая салідарнасць не ведаюць межаў. Жадаю вам мужнасці, трываласці і ўпартасці ў справе абароны правоў чалавека і дэмакратычных свабодаў у Расіі.
За нашу і вашу Свабоду!
З павагай,
Аляксандр Мілінкевіч
Старшыня Руху "За Свабоду"
Лаўрэат прэміі імя Андрэя Сахарава 2006 году
Усе навіны