Мілінкевіч звярнуўся да міністра эканомікі
Шаноўны Спадар Міністр,
Разам з усёй бізнэс-супольнасцю Беларусі заклікаю Вас скасаваць пастанову Міністэрства эканомікі № 179 “О внесении изменений и дополнений в некоторые постановления Министерства экономики Республики Беларусь и признании утратившим силу постановления Министерства экономики Республики Беларусь от 29 июля 2008г. № 156”, прынятую 27 жніўня 2008 г.
Лічу што:
1.Пастанова № 179 не здольная змяніць сітуацыю на ўнутранным рынку Беларусі, бо наша краіна мае патрэбу ў імпартаваных таварах, якая не можа быць задаволеная ўнутранымі вытворцамі. Наадварот, прымяненне Пастановы непазбежна выкліча банкруцтва многіх імпарцёраў, ліквідацыю працоўных месцаў у сферы гандлю і, самае істотнае, дэфіцыт шматлікіх тавараў на ўнутраным рынку.
2.Пастанова № 179 можа спыніць пастаўкі ў Беларусь шматлікіх тавараў крытычнага імпарту, такіх як лекаў, хімікатаў для сельскай гаспадаркі, унікальных сродкаў вытворчасці і камплектуючых. Без іх могуць спыніць працу цэлыя галіны айчыннай прамысловасці.
3. Прымяненне Пастановы № 179 ставіць пад сумнеў эканамічную мэтазгоднасць імпарту ў Беларусь энарганосьбітаў: нафты і прыроднага газу.
4.Выбарачнае прымяненне Пастановы № 179 да пэўных таварных пазыцый створыць глебу для карупцыі. Стварэнне асобных спісаў тавараў, якія не будуць трапляць пад дзеянне дадзенага дакументу, – гэта стымул для падкупу чыноўнікаў.
Такім чынам, Пастанова № 179 не можа дасягнуць пастаўленых мэтаў па зніжэнні цэнаў на імпартаваныя тавары з-за штучнага ўтварэння дэфіцыту вышэйзгаданых тавараў. Відавочна, што ад дзеяння гэтай Пастановы сур’ёзна пацерпіць беларускі народ, у той час як вузкая групоўка алігархаў і карумпаваных чыноўнікаў будзе атрымліваць звышпрыбыткі ад гэтай антырынкавай нормы заканадаўства.
Заклікаю неадкладна скасаваць Пастанову № 179. Толькі безагаворкавае скасаванне, а не прыняццё іншых актаў якія бы змягчылі эффект Пастановы, здолее выратаваць сітуацыю і дазволіць Беларусі захаваць рэшткі інвэстыцыйнага іміджу.
Спадзяюся, што Вы прымеце рашэнне на карысць народа Беларусі.
З павагай,
Аляксандр Мілінкевіч
Перайсці да спісу
